Пробацијата е стручна служба организирана на ниво на Сектор во Управата за извршување на санкции (УИС), при Министерството за правда на Република Северна Македонија. Спроведува надзор над извршување на казните без лишување од слобода, поточно над алтернативните мерки: условна осуда со заштитен надзор, општокорисна работа и куќен затвор како и над извршувањето на условниот отпуст, изречени со одлука на судовите. Пробациската служба врши надзор на осудените лица и им нуди поддршка, а целта е да се одржи безбедноста во заедницата со подобрување на ресоцијализацијата и рехабилитацијата на лицата над кои се извршуваат пробациски работи како и да се намали затворската популација.

Пробациската служба е воспоставена со Законот за пробација (Службен весник на РМ 226/15) од 2015 година. Пробациските службеници се државни службеници вработени од Управата за извршување на санкции, Министерство за правда. Пробациската служба е составена од мултидисциплинарен тим на дипломирани правници, психолози или социјални работници кои се обучени за извршување на пробациски работи согласно националното законодавство и меѓународните стандарди.

Осудените лица треба да ја контактираат пробациската служба во случај од судот да им биде изречена казна или мерка без лишување од слобода, поточно доколку со одлука на суд им е изречена алтернативна мерка или доколку се условно отпуштени од издржување на казна затвор. Пробациската служба соработува со правосудните органи и други релевантни институции и невладини организации.

Пробациската служба го поддржува и надгледува сторителот во следењето на условите и извршувањето на обврските изречени од судот како дел од санкцијата или мерката без лишување од слобода. Пробациската служба директно го известува судот, кој одлучува за понатамошното извршување на санкцијата, дури и во случај на непридржување кон обврските.